Kaka & Wah (麗江 婚紗攝影．April 2011)
喺我哋今年三月決定咗出年三月結婚之後,我哋就去搵邊度影婚紗相好.
咁我哋兩個都唔鍾意係香港影,唔想影出嚟嘅效果同好多人一樣,我哋又唔鍾意係台灣同澳門影,台灣又係太多人去影而澳門啲景就冇乜特別.咁我朋友就介紹咗Fei Wedding比我哋,跟住就上網睇吓啦,原來佢哋都有好多影點,有麗江,九寨溝,日本…等等.影出嚟啲相同風景都好靚,啲景好吸引我哋.跟住就去咗婚紗展再睇吓先,去到Fei Wedding攤位,當時我哋都係企係度睇吓先,佢哋都唔會迫你坐低先,再過一陣我哋就坐低咗,kate好有耐性咁介紹啲詳情比我哋知,而kate係介紹啲詳情時,唔會太hard sell又唔會有你一坐低就要join嘅感覺,咁我女朋友想影雪景,所以kate就介紹咗雲南麗江比我哋,我哋想五月去影,kate話要影雪景就要四月尾前去影就一定有,唔係就要去到年尾,咁我哋又唔想年尾先去影,咁就決定咗四月影,當時都已經係三月,我哋問有冇位比倒我哋影,kate check咗仲有幾日有位影,咁就決定join咗麗江兩天,join咗之後kate都唔會要你加哩啲加嗰啲,係咁多就咁多.
到揀衫當日,我之前諗,我哋咁趕得番一個月先去揀衫啲衫都唔會有太多比我哋揀,不過上到去又唔係我諗咁,啲衫好乾淨,啲款都好多,而佢哋都比咗好多意見我哋,咩景著咩衫好,又比啲相我哋睇個景係點,等我哋唔會揀錯衫.
Join咗之後都擔心好多野.例如:交通安排,住宿得唔得,天氣好唔好…等等,我哋有咩問題就打比kate問,kate都冇嫌我哋煩,又幫我哋解決晒啲問題,仲要比咗份資料我哋,我哋先放心好多.
到攞衫當日,可能係我女朋友瘦咗關係,啲衫唔係好啱身,而要佢哋即時改,佢哋都冇黑面,真係要讚吓佢哋啲服務態度,其實當日佢哋好忙,又有人揀相又有人試衫,我哋又約咗佢哋差唔多收工時間先上去,攪到佢哋唔可以準時收工.
到咗麗江,佢哋已經安排咗專人係機場接我哋同車我哋去客棧,而佢哋又安排咗一間好有特色又有啲似民宿嘅客棧比我哋,老板娘又好好人,佢又介紹咗當地有什麼好食嘅野同有咩地方好去比我哋.夜晚就同攝影師,化妝師,助手見面,化妝師就問我哋帶咗咩衫過嚟,而攝影師就問我哋想點影,我哋講咗想點影,而佢哋又比咗啲意見我哋.
到咗第一日拍攝,化完妝同食埋早餐,就去”玉龍雪山”,上到雪山,天氣好好,唔係太凍,可能有太陽嘅關係,所以唔係好凍,攝影師搵好位置就開始我哋嘅婚紗拍攝,開始都有啲唔係好慣有專人幫我哋影相,所以我哋啲pose擺得唔係咁好,攝影師同化妝師都好有耐性咁教我哋點擺pose好,影咗個半鐘左右開始大風同感覺有啲凍,所以咁就唔再影落去.跟住食咗午餐就去埋”雲杉坪””白水河”之後返客棧休息一陣就再影埋夜景,第一日嘅拍攝就順利咁完成.
第二日拍攝,天氣都好好,首先就去咗影古城屋頂,再去埋”束河古鎮””黑龍譚公園”去”拉市海”途中,他們帶我哋去影埋油菜花田.經過第一日合作,我哋都知道攝影師要我哋點擺pose.當天就好順利咁拍攝完,兩日嘅麗江婚紗攝影咁就完成.拍攝完畢我哋約埋他們一齊食飯,慰勞他們兩天照顧.
再次多謝攝影師,化妝師同助手,他們真係好好人,好親切,多謝攝影師(大剛),佢真係一位完美主義者,對於佢嘅工作佢真係一絲不苛而且非常專業,有時有啲相效果佢唔係咁滿意我哋就要影過再影過,影到佢滿意為止,最初,我哋見佢好似無乜野講,都驚大家會溝通不足,影得唔好,點知佢真係好專業,佢比我哋嘅感覺雖然較沉默寡言,佢做嘅一切都係想我哋擁有一輯完美嘅相,這一點我哋深深感受到了.而係雪山佢瞓係雪地上面幫我哋影相,又有耐性咁教我哋點擺pose,.又幫我哋搵唔可以太高又唔可以太低嘅油菜花田,都搵得好辛苦.佢拍完一個影點又比我哋睇番先,睇吓係咪我哋要求,出黎既效果又好好喎.多謝化妝師(明華),係哩兩日佢都比預定時間早到幫我哋化妝,佢先問我女朋友想點化妝,就跟住點化,化咗出嚟嘅效果同我女朋友要求嘅差唔多,又唔會好大陸feel,之前我女朋友都驚佢化出嚟會好大陸feel,每次化完都問我女朋友鍾唔鍾意,又每件衫化唔同嘅妝.多謝助手,佢都好盡心幫我哋,有時我哋唔係咁明攝影師想我哋點做,佢都幫我哋做翻譯,又幫我哋拎野.佢哋令到我哋係拍攝過程都係輕鬆同愉快嘅氣氛下渡過.返到黎仲會好掛住佢哋.
返到香港揀相,我哋足足用咗五個鐘嚟揀相都仲未揀好相,我哋又要阻住人哋收工喇,而佢哋都冇催我哋,要今日揀好相,咁我哋就再約過第二日再揀過.
最後真好多謝Fei Wedding所有工作人員,佢哋嘅工作態度又專業,令到我哋好放心.又有耐性聽我哋嘅要求啲咩.又相當親切,令到我哋影得好開心.令到我哋有一輯滿意嘅婚紗相.
(感謝 Kaka & Wah 與我們分享美麗的婚照)
更多麗江作品請往：http://feiwedding.com/fei-gallery/LiJiang
Fei Wedding Photography 菲．攝影
www.feiwedding.com
facebook 專頁 www.facebook.com/feiweddinghk
